香港有近百萬人活喺貧窮線下，當中唔少需求助食物銀行或社區飯堂。社創基金宣佈委聘聖雅各福群會為食物援助旗艦項目嘅協創機構，協助香港食物援助服務「升呢」，3年內會資助1,000萬元。
料受惠人數多三成
社創基金專責小組主席張仁良同八方講，查實好多商界人士都熱心捐助食物，但因種種原因而令供應未能同有需要嘅機構配對，最後餵飽堆填區，好大嘥，所以社創基金呢個項目唔係直接買食物畀有需要嘅人，而係利用資訊分享、宣傳推廣等，為業界提供協作平台，將來無論食物捐贈者、服務提供者或機構或受助人士，都可通過新建平台，及時掌握食物嘅供應同需求情況，增强派飯效率同效益。
張仁良預計至2019年底，全港嘅社區飯堂可以提供每日超過5萬份熱食同包裝食品，比家增加五成，受惠人數亦將逾兩萬人，比家多三成！3年1,000萬做得到咁嘅效果，簡直係蔗渣價錢燒鵝味道，抵啦！
Source: Apple Daily | 2016-06-27