香港貧富懸殊問題嚴重，近百萬人活喺貧窮線下，當中唔少需求助食物銀行或社區飯堂。社創基金今日宣佈委聘聖雅各福群會為食物援助旗艦項目嘅協創機構，協助提高香港食物援助服務嘅效益，三年內資助一千萬。
唔好以為社創基金泵水係因為港人唔夠愛心，社創基金專責小組主席張仁良話，查實好多商界人士都熱心捐助食物，但礙於種種原因，呢啲供應往往未能同有需要嘅機構配對，最後餵飽晒堆填區，好大嘥，所以社創基金今次嘅項目唔係直接買食物畀有需要嘅人，而是利用資訊分享、宣傳推廣等，為業界提供協作平台。
具體講，即係將來無論食物捐贈者、服務提供者或機構或受助人士，都可以通過新建立嘅平台，及時掌握食物嘅供應同需求情況
，增强派飯效率同效益。聖雅各福群會要網絡有網絡，要經驗有經驗，相信可以將香港嘅食物援助服務提升至另一層次。
張仁良預計至2019年底，全港嘅社區飯堂可以提供每日超過5萬份熱食同包裝食品，比依家增加五成，受惠人數亦將會超過2萬人，比宜家多三成！一千萬做得到咁嘅效果，簡直係蔗渣價錢燒鵝味道，抵啦！
Source: Apple Instant News | 2016-06-26