為咗照顧貧苦大眾嘅三餐，好多慈善機構都有設立社區飯堂派飯。但Ray聽講，負責派飯嘅慈善機構，本身亦面對著資源分配不均嘅情況。雖然有唔少商界人士都有心捐錢捐食物支持派飯，但係基於種種原因，唔少飯堂仍要跨區接受捐贈食物，運作成本高昂，所以每日都有大量剩食無法善用。
社創基金今日就宣布委聘聖雅各福群會，負責旗下的食物援助旗艦項目，同以往嘅食物援助計劃唔同，項目著重協調如食物捐贈者與社福機構，加強食物捐贈者、營運者、受助組織及受助人士嘅溝通，分享如食物供求情況及相關服務等資訊，解決依家香港食物援助服務供求不平衡嘅問題。
聖雅各福群會預計，項目最快2017年可以喺3個地區試行，2019年中可以擴展至全港18區，到2019年底，預計全港每日就可以提供超過5萬份熱食及包裝食品，比現時嘅供應足足增加五成，受惠人數亦將比依家多三成，超過兩萬人。
今次計劃的好處不止令人人有飯開，仲可以增加食物捐贈比例，解決香港剩食嚴重嘅問題，變相減少食物浪費。社創基金呢次都可以話係一箭雙鵰！
投身傳媒工作多年，由市場研究做起，一直與公關、廣告、新聞界結下不解緣，心境永遠青春。
Source: am730 | 2016-06-27