雖然未到聖誕，但黛安已經同班姐妹約好一齊慶祝。上周六舉行咗香港歷來最大嘅戶外剩食宴「惜食共享嘉年華」，黛安就同200幾位市民一齊品嘗「二次製作」嘅聖誕佳餚，非常好味！
扶貧委員會轄下嘅社創基金，舊年請左聖雅各福群會做協創機構，推展食物援助旗艦項目，而FOOD-CO係全港首個全方位食物援助平台，希望教育公眾惜食共享呢個理念。今次嘅嘉年華就係元朗錦田舉行，將籌到嘅1.5噸剩食和飲料做食材，重新炮製咗10款聖誕美食，既好味又有創意，實在抵讚！
公關姐妹就話，好多人覺得剩食一定係冷飯菜汁，其實好多時只係賣相唔好，或過咗最佳食用期，並非其他人食剩或者過期變壞嘅食物。香港每日產生高達3,000幾公噸廚餘，當中唔少就係呢啲食物。黛安都呼籲「食唔晒，唔好嘥」，將新鮮剩食轉贈他人，最重要唔好買過多食物！
撰文: 黛安 消息特靈八卦公關
欄名: 八卦名利場
Source: 晴報專欄 | 20171218